ПОКАНАТА

Денес на врата ми дојдоа две млади момчиња во полициска униформа и ми врачија ПОКАНА која јас уредно ја примив (види прилог) потпишана од некој полициски службеник Бобан.

Ме покануваат да се видиме на 25.05.2016 во 9 часот во полициска станица Центар.

Ова поканава ептен интересно четиво испадна. Проблемот е само што дава многу чудни и противречни информации. Ама во секој случај e инспиративна.

  1. Тие што ја испратиле се повикуваат на член 279 (став 2) од Законот за кривичната постапка.

Со овј член се регулира повикување од страна на правосудна полиција заради прибирање известувања за сторено кривично дело. Ако не сакаш да дадеш известување не мораш (треба само да се појавиш – самиот или твој адвокат).

Според член 46 од Законот за кривична постапка должност на правосудната полиција е по службена должност или по наредба на јавниот обвинител да презема мерки и активности со цел за откривање и криминалистичко истражување на кривични дела, и сите мерки и активности што можат да користат за непречено водење на кривичната постапка.

Според членот 51 од Законот за кривична постапка  правосудната полиција работи по налог на надлежните јавни обвинители и за своето постапување согласно со одредбите од овој закон припадниците на правосудната полиција се одговорни пред надлежниот јавен обвинител.

Полицајците (оние двете млади момчиња) не се претставија како правосудни полицајци, Бобан (оној потпишаниот) не се претставил како правосуден полицаец, во разговорот не ми спомнаа никаква кривична постапка или налог од јавен обвинител, така што претпоставувам дека најверојатно повикувањето на членот 279 е онака, за да добие поканата во важност.

  1. Поканата понатаму се повикува и на член 43 (став 1) од Законот за полиција.

Според овој член полицијата е овластена писмено со покана да повикува граѓани заради собирање потребни известувања неопходни за извршување на полициските работи.

И според овој член, ако не сакам да дадам известување, можам слободно да си одам и не смеат повторно да ме викаат заради истите причини.

Значи, повторно, ме викаат на муабет.

  1. После сето ова објаснување дека ме викаат на муабет, се случува неочекуван пресврт во текстот, и одеднаш се појавува некаков “сторен прекршок за време на протестите“.

Во овој дел веќе не сум сигурна што сака да каже писателот.

Во поканата не се спомнува кој го направил прекршокот кој кривично се гони по налог на јавно обвинителство и за кој бараат од мене информации. Можеби ме викаат мене да им дадам информации за прекршок кој сум го направила јас? Можеби не знаат каков прекршок можат да поврзат со мене, па им треба дообјаснување, да им помогнам? Или станува збор за прекршок кој го направил некој друг па од мене очекуваат информации? Крајно неизвесно.

Во поканат не се спомнува ни за кој прекршок станува збор. Можеби сакаат со мене како професор да разговараат за поимот на прекршок? Или пак не можат да се решат па ете така си ставиле, а во меѓувреме веќе ќе решат. Во поканата не се спомнува ни закон ни член па ете така поимот прекршок лебдее во воздухот отворен за сите можни толкувања.

Во поканата се спомнуваат “демонстрациите“. Нема ништо подетално на кои демонстрациите се мисли. . И јас не сум сигурна за кои демонстрации станува збор. Јас сум била на толку многу што престанав да водам веќе рачун. Ете, неодамна бев во Охрид па можеби мислат на тие демонстрациите или на оние во Берово, или на Тетово, или Велес или … Многу интригантно ова со демонстрациите.

Во секој сличај, можам да им помогнам кога станува збор за демонстрациите на ГДОМ. Е за овие демонстрациите може да се направи листа (по азбучен ред) на прекршувања на неколку закони, а богами и кривични дела и прекршувања на меѓународни договори, па и неколку членови од Уставот.

И тоа со прекршок за време на демонстрациите е некоја метафора или стилска фигура? Не сум сигурна. Бидејки демонстрациите по својата суштина се нарушување на јавниот ред и мир (најмалку на членовите 4, 8 и 13)  најверојатно станува збор за нешто кое сум го направила додека сум била на демонстрации а кое излегува надвор од нивната содржина. На пример сум се опијанила па сум почнала да пеам (што може дури и под кривична одговорност да потпадне), сум организирала борба на животни, сум се оддала на уживање на наркотични дроги, …  или нешто слично.

Ама ако сум добила казна за прекршок (кој и да е од горе наведените, посебно за пеење – жими мајка не пеев) не знам зошто би ме канеле на муабет. Казната се испраќа по пошта. Може и по електронска дури. Па си има жалбена постапка, па суд. Па докажување. Па казна за вознемирување со неосновани обвиненија. Се по ред.

Едвај чекам да видам како понатаму ќе се развие оваа покана. Станува прилично напнато и секој пресврт може да биде интересен.

Прилог – Поканата

Picture1

Comments (4)

ПротестирачMay 25th, 2016 at 1:06 am

Нема потреба да се мачиш професорке за да разбереш што сакал поетот да каже! Со какви копуци, чавки и страчки си имаме работа, само си го губиш времето. Туку ако ти се види некој поасален одржи им предавање за правните процедури белким нешто ќе запаметат?!

Само како фикусот Иванов да го подучи некој? Човекот ако треба пак ке помилувал! Кај нас за вакви се вели дека или е глуп или ногите му смрдат!!!!
Ќе да е ова првото!!!

УчителкаMay 25th, 2016 at 2:29 am

Мирјанче, со ова обраќање (соопштување) сега ептен ги стави во мисла и си велат :
„Каков ли протестант си викнавме ние… Законот женичкава си го знае на прсти (за некои и самите не сме си ги проучиле доволно). “ Е, сега дури ќе си ВИДАТ со кого муабет ќе прават. Со личност која народот ја сака и цени токму заради искреноста и Е’ со народот. ТОЈ народ очекува од ВАКВИ луѓе да тргне државава на поарно. А, вака се сака да се спречи секакво поинакво мислење од (не)реалноста.
Ти си силна и таква остани ! Не си сама, знај. (Бар генерацијата сигурно е со тебе! )
Поздрав.
PS – Пред „Беко“ имаш подршка од клас. :*

PericaMay 25th, 2016 at 10:18 pm

Ke prodiskutiram samo za aspektot na pravnata pismenost na pokanata. Kako preveduvac bev direktno involviran vo policiskite reformi koi zapocnaa pred edno 10 godini, so dokumentot za reformi na MVR, sto proizleze od proektot PRP, go vodea eksperti od Germanija. Pa se formira OBSE policiska akademija vo Idrizovo. Pa sledea milioni proekti fondirani so milioni Evra, se so cel nesto da se pomrdne vo skamenetosta na MVR. Na lokalno nivo, pri nekakvi obuki od strana na stranskite eksperti, odgovorite na OSL bea deka “pa nie ova sme go ucele”. Da , go ucele vo bivsata SFRJ, sto samo dokazuva za silata i obrazovanosta na togasniot kadar vo MVR. Da skratam, sega, vo 2016 godina, seuste nema junak sto ke napise edna uredna POKANA???

Ајван Доктор®June 2nd, 2016 at 10:36 am

Прекршок ли е, кривично дело ли…? Ниту едното, ниту другото. Меѓутоа многу тешко им е да откријат која интелегентна глуперда од ГДОМ залепила преку спомениците (Гули и оној на нивните „герои“) плакат на кој пишува: „СТОП на хулиганството“, само за да не се чита текстот со ВМРО („невер мор“ си останува). Врв на (в)моронштина!

Leave a comment

Your comment