ЗАШТИТНИЦИ НА КРИМИНАЛОТ

се луѓе кои од позиција на моќ ги штитат тие кои краделе, мамеле, убивале, измачувале, рекетирале, понижувале исто така од позиција на моќ.
Со тоа што ја блокираат работата на Собранието овие луѓе го поткопуваат уставниот поредок на државата.
Со тоа што директно и/или индиректно поддржаа насилство во Собранието, овие луѓе учествуваат во насилно рушење на уставниот поредок на државата.
Со тоа што не дозволуваат да биде сменет ЈО против кој демонстрираа илјадници граѓани многу долго време, овие луѓе спречуваат да се воспостави правната држава и да почне да функционира правосудниот систем.
Мислам дека оние кои гласале за партијата на која и припаѓаат треба да почнат да им поставуваат прашања за тоа како ги застапуваат нивните потреби и интереси, како нивната работа обезбедува подобар и посигурен живот на граѓаните на Македонија и како со своите активности го овозможуваат владеењето на правото.

БЕЗ НАСЛОВ А СО ПОВОД

ДПМНЕ излезе со МАНИФЕСТ за Единствена Република Македонија.

Основниот заклучок кој може да се изведе од читањето на “манифестот“  е дека ДПМНЕ се обидува да ги избрише изминатите 10 години (од историјата и од меморијата на луѓето), како никогаш да не постоеле и нуди визија за прашања кои требаа да бидат разрешени во изминатите 10 години на владеење на ДПМНЕ (ЕУ интеграција, попис, НАТО интеграција, воспоставување добрососедски односи, владеење на правото, одговорност, функционирање на институциите, образование, односи меѓу различните етнички заедници, …). Со други зборови, се она што требало да го направи ДПМНЕ во 10-те години на апсолутно владеење, а што не го направило го нуди како нова визија за наредниот период. ЕДИНСТВЕН ЗАКЛУЧОК КОЈ МОЖЕ И ТРЕБА ДА СЕ ИЗВЕДЕ ОД ОВОЈ ДОПИС НА ДПМНЕ Е ТОЈ ДЕКА, БИДЕЈКИ ЗА 10 ГОДИНИ ДПМНЕ НЕ УСПЕАЛО ДА ПОСТИГНЕ НИТУ ЕДНА ОД ПОСТАВЕНИТЕ ЦЕЛИ, ЈАСНО Е ДЕКА ЗА НИВНОТО ОСТВАРУВАЊЕ ВЛАСТА МОРА ДА БИДЕ ВО РАЦЕТЕ НА ДРУГА ПОЛИТИЧКА ГАРНИТУРА КОЈА МОЖЕБИ ЌЕ ЗНАЕ КАКО ДА ГИ ОСТВАРИ.

Што можеме да видиме во овој МАНИФЕСТ?

  1. ДПМНЕ покажува апсолутна политичка незрелост бидејки предлага меѓународни односи базирани на принципот на наплаќање на дадена помош. “Памети кому сме му помагале во тешки моменти.“
  2. ДПМНЕ покажува дека нема појма што се човекови права  и не може да очекуваме дека ќе знае во блиска иднина да ги заштити и промовира, бидејки на ниво на петогодишно дете си мисли дека правата се заслужуваат и се наплаќаат. “ Тие што го кршат ова право, не можат да ни го земат.“
  3. ДПМНЕ се уште не преминале од концептот НАРОД на концептот ГРАЃАНИН и се додека не го направат овој премин нема да можат ни да бидат политичка структура која може да гради граѓанска држава на 21 век, туку можат да изградат само држава на 19 век. “Обединувањето преку нација, вера и култура е формула за Европска интеграција, каде секој може лично да развива сопствени чувства. Тоа е и формулата која остава простор за јакнење на поврзувачкиот фактор во општеството.“
  4. ДПМНЕ не го разбираат принципот на владеење на правото како систем во кој се применуваат законите, а не на воспоставена пракса надвор од законите (па дури и со прекршување на законите) “… важноста на праксата за тн. коалицирање на победници од етничките заедници како фактор на дополнителна стабилност…“
  5. ДПМНЕ не го разбира постоењето на правосудниот систем кој го санкционира прекршувањето на законите и повикуваат на политички или на линч на масата, односно, убивање на различните видувања и слободата на изразување.
  6. ДПМНЕ ги отфрла како немакедонци сите оние кои немаат религиозни уверувања. “Верските заедници во Макeдонија се неотуѓив дел од македонскиот менталитет и македонското општество.“
  7. ДПМНЕ не го разбира современиот начин на социјална поддршка базиран на еднаквоста на правата и човечкото достоинство, кој многу одамна ги надминал границите на религиозната помош “Солидарноста и подготвеноста да му се помогне на сиромавиот се во духот и на христијанството и на исламот и на јудаизмот.“
  8. ДПМНЕ не нуди иднина туку отвора пат за минатотот. “ Потребно е да се оживеат старите традиционални вредности.“
  9. ДПМНЕ бара апсолутна власт и унификација (базирана на племенско делење) наместо партиципација на сите граѓани и задоволување на потребите и интересите на различните индивидуи. “…бонус од 20 пратеници за победникот на парламентарни избори …“
  10. ДПМНЕ нема намера да развие систем на контрола над власта. Највисокиот дострел кој формално го нуди е “отчетност“ на функционерите во власта, наместо одговорност и санкционирање на прекршувањето на законите.
  11. ДПМНЕ нема појма што значи да се стане дел од ЕУ и бара забрана на “ вмешувања во внатрешните работи на Република Македонија, од страна на странски политичари или држави …“.
  12. ДПМНЕ нема појма што значи работа на институциите и бара вонинституционална осуда на различните видувања. “Заедничко отфрлање на планови, платформи или агенди кои се надвор од нашето уставно уредување или се спротивни на Македонските стратегиски државни интереси.“
  13. ДПМНЕ спречува било каков напредок на системот и забранува воопшто и да се размислува за промени.

СЕТО ОВА ПОКАЖУВА ДЕКА ДПМНЕ Е НЕЗРЕЛА, НЕПИСМЕНА И ПАРТИЈА СО МНОГУ ОГРАНИЧЕНИ КАПАЦИТЕТИ. КАКО ТАКВА ДПМНЕ Е МНОГУ ОПАСНА И ПРЕТСТАВУВА КОНТИНУИРАНО ДЕСТРУКТИВЕН ЕЛЕМЕНТ НА ПОЛИТИЧКАТА СЦЕНА НА РЕПУБЛИКА МАКЕДОНИЈА.

ВАКВА ПАРТИЈА НИКАКО НЕ СМЕЕ ДА ИМА ВЛАДЕЈАЧКА ПОЗИЦИЈА.

ЗА ДВОЈАЗИЧНОСТА И ЗА ФЕДЕРАЛИЗАЦИЈАТА

Првиот ден по референдумското изгласување на раскинувањето на Велика Британија со Европската Унија, најбаран податок на интернет од страна на граѓаните на Велика Британија бил: што е ЕУ (https://www.washingtonpost.com/news/the-switch/wp/2016/06/24/the-british-are-frantically-googling-what-the-eu-is-hours-after-voting-to-leave-it/, http://www.telegraph.co.uk/technology/2016/06/27/were-brits-really-googling-what-is-the-eu-after-voting-to-leave/, http://fortune.com/2016/06/24/brexit-google-trends/, …).

Ова само покажува колку е лесно да изманипулираш голем број луѓе, кои ќе изгласаат решение кое е директно спротивно на нивните интереси.

Треба само да употребиш одреден број зборови и фрази кои поттикнуваат на револт, да бидеш спремен безочно да лажеш до ниво на потполно отсуство и на траги од вистина, да играш на картата на неукост и глупост на голем број луѓе и да го прогласиш за непријател секој оној кој ќе проба да се спротистави или да проба да го анализира кажаното.

Токму ова се случува моментално и во Македонија. Пред наши очи. Луѓето се манипулираат и се наведуваат да гласаат против себе и против сопствените интереси. Луѓето се тераат сами да си стават јамка околу вратот и сами да се поткачат на столчето и сами да го бутнат од под сопствените нозе.

Јас така го разбирам атакот на моќната пропагандна машинерија на ДПМНЕ која почна да се пенави над идеите на мултикултурноста и локалната самоуправа.

Во бесното лаење, мултикултурноста се претвора во баукот – двојазичност, а локалната самоуправа станува баба рога која зад грб го крие ножот со кој ќе ја распори државата и сето тоа под плаштот на редефинирање на државата.

Груевски со факти го разобличи Заев околу ставовите за двојазичност и федерализација

За што зборува Заев кога вели редефинирање на државата?: Двојазичност – федерализација – отцепување

Како некој кој во 1995 година бранел докторат со кој ја промовирал мултикултурноста и го промовирал граѓанскиот наспроти етничкиот модел, чувствувам обврска да застанам во одбрана на идеите на СДСМ.

Јас лично мислам дека ова што денес го промовира Заев како програма на СДСМ претставува показател на зрелоста на партијата на која и требаше многу време да се ослободи од прангите на етноцентризмот и да навлезе во просторот на граѓанското моделирање на државата кое подразбира поставување на индивидуата и нејзините потреби и интереси во центарот на делувањето на државата.

Она што во моментов го имаме е држава во која постојат два паралелни светови. Луѓе кои од најмала возраст живеат во издвоени заедници, одат во различни градинки, одат во различни училишта, во различни кафеани, на различни места на собирање. Држава во која луѓето од различните етнички заедници растат без да имаат можност да се запознаат, да се засакаат, да се здружат, да ги препознаат истоветностите и различностите.

Во моментов имаме поделена држава која не е добра за никого. Имаме држава во која во највисокото законодавно тело се зборува на два јазика, во која службениот весник се печати на два јазика, во која документите во министерствата се изработуваат на два јазика, меѓутоа во која граѓаните не можат на шалтерите во целата држава да поднесат барање и на својот јазик, ниту пак можат да ги прочитаат упатствата на производите на сопствениот јазик, ниту да ги добијат информациите поврзани со обврските кон државата на сопствениот јазик, ниту пак да очекуваат дека докторот или медицинската сестра во некоја болница надвор од местото на нивното живеење зборува и на нивниот јазик.

Јас лично мислам дека парламентарците во Собранието мораат да зборуваат на еден јазик затоа што тие ги претставуваат интересите на сите граѓани и на нив е пренесен суверенитетот на сите граѓани. И мислам дека службениот весник мора да биде на еден јазик. И мислам дека секој висок функционер во власта мора да го зборува многу добро јазикот на мнозинството.

Меѓутоа мислам дека државата треба да промовира најразлични начини кои ќе им овозможат на граѓаните да можат да ги добијат секојдневните информации на сопствниот јазик. Да стимулира лекарите и наставниците и администраторите и сите во услужните дејности да зборуваат колку што е можно повеќе јазици на етничките заедници кои живеат во Македонија. И тоа да биде предност про вработување, нешто што носи поени.

И мислам дека децата треба да се поттикнуваат да ги учат јазиците на етничките заедници кои живеат во Македонија. Од најмала возраст. И да бидат заедно. Од најмала возраст. И да се мешаат. Од најмала возраст.

И мислам дека локалната самоуправа треба да има многу поголеми ингеренции од овие кои ги има. Луѓето да можат да ги задоволат своите потреби и интереси на локално ниво.

Многу е мал опсегот на работи кои бараат унифицирано постапување и учество на централната власт. Тоа се рамки на делување, генерални правци на развој, најопшти вредности кои го детерминираат политичкиот систем. Се друго е задача на локалната власт.

И полицијата треба да има своја само локална димензија, и социјалата и образованието, и животната средина, и комуналиите, и … Впрочем и самиот закон тоа го предвидува и стимулира.

Секое мешање на централната власт во работите на локалната власт, кое ги надминува потребите на генералното постапување поврзано со промоцијата и заштитата на општите вредности, е неовластено и штетно.

Силната локална самоуправа не создава почва за федерализација.

Почва за федерализација создава моќната централна власт која на највисоко ниво ја дели државата на сфери на вилајание, која го дели колачот меѓу етницитетите и која ги сместува граѓаните во нефлексибилни групи оградени со ѕидови.

Силната локална самоуправа создава можност за задоволување на потребите и интересите на индивидуите, за нивна флексибилност и мобилност и за чувството дека цела држава е моја држава.

Во моментов Македонија е неформално федерална држава во која е направена многу јасна поделба меѓу две мафијашки семејства кои ја контролираат целокупната територија. Во моментов има предели од Македонија во кои не се чуствувам како да сум дома и во кои не би отишла без некоја посебна причина.

Секое разбивање на оваа поделба значи загрозување на мафијашките кланови и нивните кревки договори испишани во крв.

Затоа јас го поддржувам новиот пристап на СДСМ, за кој мислам дека предолго созреваше, и остави простор за дивеење на етномафиите во Македонија. Сега е оној последен момент во кој може државата да ја вратиме на граѓаните.

Заради ова, секој напад на идеите поврзани со мултикултурноста и со локалната самоуправа ги разбирам само како обид најубавите, најпрогресивни и најкорисни идеи кои можат да го подобрат животот на голем број граѓани да се извитоперат до ниво на непрепознатливост и да им се сервираат на граѓаните како застрашувачки можности кои мораат да бидат отфрлени со цел да се  создаде облак од какафонично блаботење, кое овозможува прикривање на интересите на двете етномафии.

ДА НЕМА ЗАБУНА ЗА ТОА ШТО МИСЛАМ ЗА КОГО ТРЕБА ДА СЕ ГЛАСА НА ИДНИТЕ ИЗБОРИ

Јас мислам дека треба да се гласа за СДСМ.

Не затоа што е нешто којзнае колку добра партија. Не мислам дека е којзнае колку добра партија.

Не затоа што верувам дека може да внесе некои коренити промени. Не верувам дека може нешто од корен да промени.

Не затоа што на нивните листи се наоѓаат најспособните, најчесните, најмудрите кандидати. Не мислам дека на листите се наоѓаат најдобрите, најдоблесните и најчесните.

Не.

Јас мислам дека треба да се гласа за СДСМ заради тоа што тоа е во моментов единствениот начин да излеземе од лавиринтот на диктатурата. Ние се наоѓаме во стапица која не уништува.

Препорачувам да го погледнете филмот Лавиринтот на Пан (Pan’s Labyrinth – 2006, El Laberinto del Fauno).

images

Во такво мрачно време-невреме сме заглавени и СДСМ е онаа едвај подотворена врата. Не кон слобода, не кон светла иднина, не кон големи промени, туку кон лавиринтот на демократијата.

labyrinth

Тоа е она што во моментов го имаме на располагање.

Тоа е шанса да добиеме минимални услови во кои ќе се вратиме кон правото и принципите и критериумите и одговорноста и партиципацијата.

Да ви кажам право, со многу поголем ќеиф би гласала за Левица. Всушност тоа е мојата вистинска определба (и покрај сета нивна сировост, и младост, и несигурност). Меѓутоа, мислам дека во моментов, тоа би било грешка. Од две причини:

1.Левицата во Македонија не е созреана за да може да го победи вистинскиот монструм од лавиринтот.

2.Кога левицата доаѓа на политичката сцена после големи проблеми, деформации на системот и големи нарушувања на демократијата, има големи шанси таа да стане нов диктатор. Левицата треба да израсне како нужен продукт на развиената демократија, која го истрошило модусот на сопственото постоење, бара нови решенија.

Многу ќе треба да се работи со СДСМ за да стане демократска партија која има капацитет да гради демократско општетсво.

Ама, тоа е се што во моментов имаме.

А мора да излеземе од лавиринтот на Пан, и би сакала тоа да се направи без принесување на жртва во крв.

ЕПИДЕМИЈА НА ГЛУПОСТ И КОРУПЦИЈА ВЛАДЕЕ ВО МАКЕДОНИЈА

Не знам што е позаразно: глупоста или корупцијата. Некако на еднакво ниво ми доаѓаат.

Навидум паметни и чесни луѓе во физички допир со глупи и корумпирани поединци и групи, преку ноќ нагло се осипуваат со препознатливите чирови на глупоста и им се дига темтепаурата на корумпираност.

Неверојатно.

Само како пример да го земеме прочистувањето на избирачкиот список. Толкава концентрација на глупост и корумпираност околу едно вакво многу едноставно прашање, одамна не сум видела.

dik-sostav

Работата е всушност многу едноставна, меѓутоа голем број луѓе дигаат прашина за да не видиме дека всушност станува збор за нивна глупост и/или корумпираност.

  1. Прво и основно, нема преговори околу тоа дали треба или не треба да имаме чист избирачки список. Станува збор за една од алатките во остварувањето на базично човеково право (право на избор) кое е во темелите на демократската држава. Значи, мора да се направи се (читај СЕ) што е можно на луѓето да не им биде ограничено правото на глас, да им се олесни остварувањето на правото на глас и да се спречи злоупотребата на правото на глас. За ова не се преговара.
  2. Второ и многу базично, основата на прочистувањето е многу едноставна  (и ставена е во закон, Устав, меѓународни документи)- секој полнолетен граѓанин на Република Македонија кој има право на глас.

Што значи тоа за прочистувањето?

Тоа значи дека на списокот не треба да има малолетници.

Тоа значи дека на списокот не треба да има починати.

Тоа значи дека на списокот не треба да има луѓе кои немаат деловна способност која им дава право да гласаат.

Тоа значи дека еден човек треба да се најде само еднаш на избирачкиот список за да може да гласа еднаш, а не повеќе пати.

Тоа значи дека на списокот не треба да има луѓе кои не се државјани на Република Македонија.

Тоа се проверува натој начин што се утврдува дали тој човек има лична карта или пасош (се разбира важечки). Ако некој има лична карта или пасош (важечки – тој човек си има право да гласа во својата држава која му ги издала овие документи, покрај сите останати права кои си ги има како носител на тие документи).

Дали постои можност за постоење на лажни документи со кои се тврди дека е некој државјанин на една држава, а всушност не е.

Да. Може да има вакви документи. Тоа се лажни или, фалсификувани документи.

Како се проверува дали документите се лажни?

Со тоа што се гледа дали во базите на податоци на државата (социјала, пензиско, даночно, здравствено, книги на родени и умрени, книги на венчани, агенција за вработување, агенција за државни службеници, …) било каде, се појавува човекот во чиј документ се сомневаме и се споредуваат податоците. Доколку има непоклопување на податоците (не се појавува на ниту едно друго место, има различни податоци на различни места. …), постои сомневање за лажен документ (независно од тоа дали е направен во некоја визба или пак од страна на криминалец вработен во МВР).

Изработката на лажни документи за идентификација е кривично дело и тој човек се гони кривично (и се разбира сите оние во ланецот кои овозможиле изработка на ваков документ).

Значи, доколку моето име се наоѓа на списокот на сомнителни граѓани објавен на страната на ДИК, тоа значи дека:

  1. 1. Некој во Тимот за компјутерска проверка погрешил ептен – ептен или „погрешил“ како за кривично дело;
  2. 2. Некој од членовите на ДИК ептен му „помогнал“ на лицето од Тимот за компјутерска проверка за да „погреши“ што исто така е тамам за кривичен прогон (за тоа се нема функционален имунитет); и
  3. 3. Претседателот на ДИК е неспособен да собере два и два, односно да направи проверка и увид и да утврди кој и како подметнал редица имиња на овој мератен список. Самата глупост можеби и не е кривично дело, ама командниот синџир значи кривична одговорност на потписникот, односно Претседателот на ДИК.

Нема потреба од докази или нешто друго освен логика за да се разбере дека ова е така.

Компјутерите не лажат (и многу, многу ретко грешат и тоа на сосема поинаков начин)! Значи, ако некој тврди дека јас всушност не сум родена во Македонија, не сум живеела сите овие години во Македонија, не сум се школувала во Македонија, не сум работела, не сум плаќала данок и придонеси, не сум стапила во брак, немам деца, не сум заведена во катастар како сопственик, немам постојано живеалиште на кое можам да бидам најдена и на кое примам пошта …  тогаш некој го фалсификувал списокот кој е објавен на официјалната страна на ДИК и за тоа треба кривично да одговара, а јас да добијам и оштета по неколку основи.