ФИЛТЕР

Од осамостојувањето на Република Македонија до денес формално и неформално ги набљудувам изборите во Македонија.

Врз основа на моето теориско и практично знаење можам со сигурност да тврдам дека се ова најнерегуларните, најнедемократските и најнеправните избори кои биле спроведени во Република Македонија. Независно од отсуството на видливи човечки жртви и отсуството на отворено физичко насилство, ова се и најнасилните избори ако се има предвид нивото на заплашување, закани, уценување и мобинг кои се манифестираа во предизборниот и изборниот процес.

Кој учествуваше во победата на ВМРО-ДПМНЕ на локалните избори 2013 и воспоставувањето на систем на едноумие каков што во Македонија немало откако постои како држава (односно, од 1945-тата па наваму)

Прво, тоа е огромниот број сиромашни луѓе кои го дадоа својот глас за ВМРО-ДПМНЕ за ситни пари, придобивки или бенефиции. Најголем дел од лумпенпролетерјатот кој се регрутира од  оние 32% луѓе кои живеат под прагот на сиромаштија во Република Маедонија.

Второ, тоа се оние чија егзистенција може да биде непосредно загрозена доколку не гласаат за ВМРО-ДПМНЕ. Голем дел од јавната администрација, пониски ешалони на државната администрација и буџетски зависници.

Трето, тоа се неуките, оние кои немаат доволно знаење или информации за да разберат дека со гласањето за ВМРО-ДПМНЕ гласаат за  опција која во многу краток период ќе се покаже како негативна за нив самите. Оваа категорија се регрутира од пензионери, земјоделци, домаќинки.

Четврто, тоа се сите криминалци, хоштаплери, поситни и поголеми измамници кои на победата на ВМРО-ДПМНЕ гледаат како на супер шанса за непречено лажење, мамење, крадење.

Петто,  тоа се интелектуалците, луѓето со вистинско образование и средна и повисока линија на државни и јавни администратори. Тоа се оние кои и покрај тоа што многу добро разбираат што се случува и каде води севластието на ВМРО-ДПМНЕ решаваат да тргнат по линијата на послаб отпор и заради малодушност или чисто користољубие, избираат да бидат поткупени. Тоа се професори од Универзитетот св. Кирил и Методиј кои молчат кога власта атакува врз автономијата на Универзитетот и гласаат за истата таа власт се со цел да бидат оставени на мира. Тоа се професори на Универзитетот св. Климент Охридски кои не се спротиставуваат на незаконската промена на деканката на Факултетот за безбедност и кои со гласот за ВМРО-ДПМНЕ си ја купуваат личната сигурност. Тоа се функционери во Министерството за надворешни работи кои меѓу двата изборни круга ги назначуваат за генерални конзули како награда за учество во изборната измама (директна или индиректна). Тоа се членови на квазинезависни контролни тела кои допрва ја очекуваат наградата за отворената поддршка на изборната измама. Тоа се претставници на невладини организации кои спроведуваат нарачани и наместени истражувања и потоа нагло градат дипломатска кариера. Тоа се мои пријатели и соработници кои си ја направија рачуницата и решија дека чесноста и принципите се преценета работа во денешно време.

Да ви кажам право меѓу она што остана после филтрирањето има здраво семе кое ветува. И кое ако биде добро засеано и негувано може да даде супер плод.

Она што ме плаши се петтата колона, кратката меморија на луѓето и способноста на трулежот да се инфилтрира и да просперира во секоја структура. И одново и одново да профитира, да се искачува на грбовите на останатите и да ја држи главата на површината туркајки го народецот неповратно надоле. Овој трулеж може да го зарази и најздравото семе и да уништи цела берба. За деканска функција, за професорско место, за место генерален конзул, на пример, во Истамбул, за дипломатска функција, за ситен бизнис.

Сега е време дасе идентификува трулежот. И дасе отстрани. Затоа што трулежот или се отсекува во потполност и се фрла или нема спас и за најздравата структура.

54 total views, 1 views today

НА ЛОКАЛНИТЕ ИЗБОРИ 2013 ЈАС ЌЕ ГЛАСАМ ЗА СДСМ И НИВНИТЕ КОАЛИЦИОНИ ПАРТНЕРИ

Зошто ќе гласам за СДСМ?

1. Затоа што е добро да се менува власта. Секое заседнување на една владејачка структура за подолг период значи поголема можност за злоупотреба, намалување на контролата, манипулација и прилагодување на системот на сопствените потреби.

2. Затоа што актуелната власт направи многу негативни потези со кои се загрози демократскиот систем кој се обидуваме да го изградиме. Извршната власт ја потчини законодавната, излезе потполно од контрола на Собранието и успеа да го прикаже донесувањето на закони по своја мерка како дел од демократскиот процес. Во изминатиот период граѓаните никој за ништо не ги прашува (дури Тодоровиќ неодамна ни соопшти дека и проектот Скопје 2014 бил спонтано изработен и не гледа зошто би требало воопшто да се прашуваат граѓаните кога се трошат нивните сопствени пари), што значи дека недостасува основниот елемент на демократското владеење – учество на граѓаните и задоволување на потребите и интересите на граѓаните.

3. Затоа што актуелната власт го уништи и самиот поим на владеење на правото. Ја дезавуира институцијата Јавен обвинител, ги сотре судовите и ги стави сите контролни тела (уставен суд, антикорупциска, народен правобранител, анкетна комисија) под чизма.

4. Затоа што актуелната власт промовира, поддржува и заштитува примитивизам, мобинг и насилство и оневозможува воспоставување на правила, процедури и критериуми кои би ја ограничиле во самовластието и би овозможиле контрола и отчетност.

Лично не мислам дека СДСМ се цветна градина. Со многу потези покажаа политичка незрелост и спремност да го стават националистичкото над граѓанското. Меѓутоа, сигурна сум дека само со смена на власта може да се извлечеме од дупката во која сме заглибени и верувам дека секоја смена на власт претставува шанса за натамошен развој и напредок.

Мојата прогноза за локалните избори 2013 е дека во поголем дел од општините ќе доминира актуелната владејачка политичка гарнитура, меѓутоа дека во голема мера ќе се намали просторот на нејзиното севластие и ќе се создадат услови за брза промена на власта и на централно ниво.

Важно е да започне промената и да се направи што е можно побргу.

Лично, се уште мислам дека наместо вонредни парламентарни избори треба да имаме технократска власт од завршувањето на локалните избори па се до моментот на редовните во 2015. На тој начин ќе се овозможи воспоставување на разрушениот систем, ќе се спречи бесмисленото трошење на парите на граѓаните и ќе се создадат услови новоизбрана власт да не ги трпи последиците од манипулациите на претходната.

46 total views, 1 views today

ТОЈ ШТО ГО КРШИ ЗАКОНОТ КОГА ГО БИРААТ СИГУРНО ЌЕ ГО КРШИ 100 ПАТИ ПОВЕЌЕ ОТКАКО ЌЕ ГО ИЗБЕРАТ

Во Изборниот законик стои:

Член 74

Од денот на донесувањето на Одлуката за распишување на избори до завршување на изборот на претседател на Република Македонија, пратеници во Собранието на Република Македонија и изборот на Владата на Република Македонија согласно со резултатите од изборите, како и од денот на донесувањето на одлуката за распишување на избори па до завршувањето на изборите за избор на  градоначалник или членови на советот, односно до конституирањето на Советот на општините и Градот Скопје не може да се врши никаква вонредна исплата на плати, пензии, социјална помош или други исплати од буџетски средства или средства од јавни фондови.

ЗАПОЧНУВАЊЕ НА ИЗГРАДБА НА ПРИМЕР НА КАТНА ГАРАЖА Е СПРОТИВНО НА ОВОЈ ЗАКОН НЕЗАВИСНО ОД ТОА ДАЛИ СРЕДСТВАТА СЕ ДАВААТ ФОРМАЛНО ОД СРЕДСТВАТА НА ГРАДОТ (ПОСЕБНО КОГА НАПОСТАВУВАЊЕТО НА КАМЕН ТЕМЕЛНИК СЕ ПРИСУТНИ ВИСОКИ ФУНКЦИОНЕРИ ОД ВЛАСТА)

Според Член 75-а

(1) За време на изборната кампања, радиодифузерите кои ги покриваат изборите можат да емитуваат 15 минути дополнително време за рекламирање на реален час емитувана програма, исклучиво наменети за платено политичко рекламирање, од кои за еден учесник во изборната кампања можат да одвојат најмногу 10 минути.

НАСТАПИТЕ НА ВИСОКИ ФУНКЦИОНЕРИ ОД ВЛАСТА КОИ СЕ ИСТОВРЕМЕНО И КАНДИДАТИ НА ЛИСТИ ЗА ПРАТЕНИЦИ МОРА ДА СЕ ЗАСМЕТААТ ВО ОВАА МИНУТАЖА. СЕ ДРУГО Е ЗЛОУПОТРЕБА НА ПОЛОЖБАТА И ПОВЛЕКУВА И КРИВИЧНА ОДГОВОРНОСТ. Кон ова мора да се приклучат и членот 76 и членот 84-а.

За останатите случаи на злоупотреба на должноста и кривичната одговорност во наредните написи.

54 total views, 1 views today

ЧОМО – АСИСТЕНТ НЕ Е ЕКСПЕРТ

Драган Гоцевски не е експерт за јавна администрација и покрај тврдењето на Чомо и пречутното согласување на дотичниот. Тој е асистент. Тоа значи дека е чирак. По онаа занаетчиската: помлад асистент и асистент се чираци, доцент е калфа, а вонреден и редовен професор се мајстори. Чиракот е некој кој сега учи, кој треба да биде под контрола, да биде насочуван и кој треба уште многу, многу да чита, да практикува и да стекнува искуства за да стране мајстор.

Не е страшно што детето Драган Греши. Се подразбира дека секој чирак има право на многу грешки. Проблем е што луѓето се заведени и може да ги земат здраво за готово објаснувањата на чиракот како објаснувања на мајстор.

Драго мое дете Драган, покрај законот за државните службеници (кој сосема солидно го владееш) постои и Кривичен законик. Во тој кривичен законик има глава под наслов:Кривични дела против изборите и гласањето.  И таму има еден член 160 кој гласи:

(1) Тој што со употреба на сила, сериозна закана, измама или на друг начин ќе спречи или друг ќе присили, да го врши, да не го врши или како да го врши избирачкото право, ќе се казни со затвор најмалку три години.

И има еден член 162 кој гласи:

(1) Тој што на лице со избирачко право му нуди, дава или ветува подарок или друга корист, со намера да го придобие да го врши, да не го врши или како да го врши избирачкото право, ќе се казни со затвор најмалку пет години.

Никаква дисциплинска или морална или било каква друга одговорност. Станува збор за кривична одговорност. Бидејки ова се права од исклучителна општетсвена важност, не е спомнато дека се поднесува приватна тужба, што значи дека Јавниот обвинител е тој што треба да ја поведе постапката. Не Агенција за државни службеници, не Антикорупциска комисија, туку орган на државата задолжен за тоа. Јавното објавување на А1 може да се смета за поднесена пријава до Јавниот обвинител, или, сознание кое тој треба да го истражи.

Драго мое дете Драган не може жртвите да ги прогласиш за соучесници. Доколку го направиш тоа тогаш никој никогаш нема да пријави ниту едно кривично дело. Уделот на жртвата во кривичното дело е нешто сосема друго од соучесништво. Со време ќе дојдеш и до таа лекција. Верувам.

Драго мое дете Драган не може да бараш луѓето да реагираат пред институциите за кои знаат дека се корумпирани и дека ваквата реакција ќе значи нивна натамошна виктимизација. Токму заради ова е измислен Јавниот обвинител. За ова е измислен Народниот правобранител кој може и сам да поведе акција (се разбира ако има муда, или газ по македонски, за тоа).

И драго мое дете, немој да зборуваш за работи кои ептен не ги знаеш. Во социјализмот на СФРЈ не беа сите буџетари. Во социјализмот на СФРЈ имаше мешана сопственост имаше и приватна сопственост. Не беше доминантна, меѓутоа беше во доволна мера присутна да не може да се стави генерална оценка каква што ти ставаш. И имаше избори кои се раководеа од многу слични принципи како и денешните.
И, едно да биде јасно, едноумието на социјализмот (таков каков што го имавме во СФРЈ) не може ни да се спореди со едноумието на ретрокомунистичките кецароши кои се сега на власт. Тоа едноумие имаше многу повеќе плурализам во себе и многу повеќе слобода на избор.
И, Чомо, ум во глава. Кога бираш експерти. Може да ги поставиш и најубавите и најпровокативните прашања на светот, ама од чирак нема да добиеш одговор.

41 total views, no views today

******* МИ Е ДВОР МИ Е

Премиерот Никола Груевски денеска информираше дека согласно Уставот и законите  и согласно предвидената динамика и рокови, ВМРО-ДПМНЕ ќе предложи до Собранието, парламентарните избори да се се одржат на 5-ти јуни 2011 година.

Со оваа изјава премиерот НИкола Груевски отворено и недвосмислено ни соопшти дека избори воопшто не ни се потребни. Со оглед на тоа дека тој решава кога ќе се распушти парламентот, кога ќе заседава, за што ќе заседава, што ќе се гласа и како ќе се гласа и кога ќе има избори, не гледам зошто ни е воопшто парламент.

Нам ни треба само Грујо. Или Бранко. Сеедно. Важно да е еден и семоќен и да командува и безпоговорно да го слушаат.

И ни треба промена на Уставот.

Член 2

Во Република Македонија суверенитетот произлегува од премиерот и му припаѓа на премиерот.

Премиерот на Република Македонија власта ја остварува  преку свои именувани послушници по пат на закана, поткупување или бизнис-партнерство

Член 8

Темелни вредности на уставниот поредок на Република Македонија се:

— основните слободи и права на човекот и граѓанинот ги определува премиерот

— слободното изразување на националната припадност за која ќе се договорат политичките водачи;

— владеењето на неправото;

— единство на државната власт;

— политичко едноумие разделено на повеќе делови и изведување на хумористичната претстава под наслов: слободни  непосредни и демократски избори;

— потполна заштита на сопственоста на премиерот и неговите соработници;

— слободата на премиерот и неговите соработници да прават што сакаат на пазарот со пазарот и околу пазарот;

— строга забрана за било кава манифестација на хуманизмот, социјалната правда и солидарноста;

— феудална самоуправа;

— уништување и дехуманизацијата на просторот и разорување и уназадување на животната средина и на природата и

— непочитувањето на општо прифатените норми на меѓународното право.

Во Република Македонија слободно е се што ќе реши премиерот или што ќе му се сони претходната вечер.

65 total views, 1 views today