ЗОНА НА СОМРАКОТ – МАКЕДОНИЈА или ШТО МИСЛИ ГРУЕВСКИ ЗА НАРОДОТ

Обраќањето на Никола Груевски  по повод денот на независноста на Република Македонија, дава ново значење на поимот ЗОНА НА СОМРАКОТ и експериментот Филаделфија.

Што ни кажа Премиерот во своето обраќање на 8.09.2015 година?

Премиерот ни соопшти дека на овие простори од секогаш живеел еден народ, но и други граѓани од различни етнички заедници и религии за кои Бог одлучил да  живеат на овие простори. Тој народ имал една мисла, да формира своја држава, која ја формирал во 1991 година, после формирањето на сопствена држава по Втората светска војна

Премиерот не поучи дека во 1991 година Македонија се ослободила од повеќеилјадигодишното ропство  кое настапило по пропаѓањето на империјата на Александар Македонски, а која низ вековите останува синоним со кој се поврзуваат   и идентификуваат луѓето кои живеат на овој простор.

По признавањето на државноста која била остварена по Втората светска војна, како резултат на борбата предводена од комунистите,  следела мачна борба за сопствена државност во која народот морал да се да се избори со комунистите кои го признале постоењето на малите народи и ја признале државноста на Македонија.

Вистинските борци и маченици за слободна Македонија, се пратениците од првиот пратенички состав на Собранието на Република Македонија од 1991 година,  кои успеале по цена на невидени ризици, напори и маки да ни ја донесат слободата, а посебно место во борбата за слобода на Македонија има Јордан Мијалков како министер за внатрешни работи.

Конечната битка започнала со референдумот за нзависност во кој сите што живеат на овие простори го дале својот глас. Од тој момент Македонија континуирано напредува и реди успеси. На тој пат на успехот НАТО и ЕУ остануваат на врвот на нашите приоритети, а попатно ќе спроведуваме и реформи кои ни ги бараат.

Во натамошниот напредок се судираме со неколку помали проблеми:

Прв проблем е јужниот сосед (оној, чие име не се изговара). Според Премиерот, тој проблем може многу едноставно да се реши до компромис кој би се состоел во тоа што соседот чие име не се изговара ќе се согласи  да седне на маса, на еден искрен муабет после кој ќе признае колку грешел сите овие години.

Втор проблем е слабата и неспособна опозиција која не може да и парира на владеачката партија и која мора да биде зајакната. Оваа и ваква опозиција е виновна за лошиот успех на учениците и поттикнува лошо и неквалитетно образование, го стимулира незнаењето и ја гради својата политика врз незнаењето (посебно на математиката) и  ја упропастува светлата иднина на генерациите ученици со ветување дека нема да мораат да учат математика.

Трет проблем е марихуаната која не смее да се легализира затоа што ќе направи многу лоши работи.

Четврт проблем се сиромашните бегалци кои се спремаат да нагрнат на Македонија, а немаат пари за превоз и кои имаат различни култури, различен степен на образование, различни религии, обичаи и начини на размислување и делување (што ги прави посебно опасни).

Петти проблем е Охридскиот рамковен договор, кој ги уништил меѓучовечките односи, меѓутоа, за среќа се појавиле поплавите кои повтрно ги приближиле луѓето едни кон други.

Шести проблем се жените кои не внимаваат на својот фертилитет, меѓутоа Владата нашла успешни решенија и раѓањето деца го претворила во најмодерна и најкултурна работа.

Владата е исправена пред голем предизвик  заради тоа што треба да се справи со  народот кој нема основни морални вредности, кој има отпор кон учењето и знаењето; мора да се посвети на провлекување способни бизнисмени – странци, заради тоа што овие домашните се потполно неспосбни; има задача да ги среди   неспособните наставници кои не прават никакви проверки на знаењето, не спроведуваат никакви тестови освен кога државата ќе ги прсили да прават екстерно тестирање и  кои најчесто се корумпирани, необјективни, подмитливи; со луѓето кои печалат пари, а кои не ги сакаат своите деца, немаат време за нив и ги подмитуваат наставниците; со младите кои се здружуваат и искажуваат поинакво мислење од она на власта што е катастрофално за општетсвото; со администрацијата во која се до 2015 се вработувале неспособни незналици без никакви квалификации, заради тоа што се до тогаш знаењето воопшто не било критериум при вработувањето во државната администрација.

Свесна за огромниот политички ризик Владата сепак се решава да ја воведе математиката како испит во матурата заради тоа што без математика  луѓето се интелектуално инфериорни и во исто време  прави грандиозни чекори кон постигнување поголема правичност со интензивно и секојдневно менување на сите закони кои претходно ги донела таа самата.

71 total views, no views today

ДАЛИ Е ГРУЕВСКИ ДОСЛЕДЕН ВО КРШЕЊЕ НА УСТАВОТ?

Доколку е точна веста дека министерката за внатрешни работи Гордана Јанкуловска поднела оставка, дека таа оставка е прифатена и дека :

... премиерот веќе испратил предлози до Собранието за нови министри, односно за местото на Јанкулоска го предложил Митко Чавков, актуелниот директор на Бирото за јавна безбедност, а на местото на Јанакиески, е предложен Владо Мисајловски.

тоа значи дека Никола Груевски го прекршува Уставот на Република Македонија според кој:

Член 97
Со органите на државната управа во областа на одбраната и полицијата раководат цивилни лица кои непосредно пред изборот на тие функции биле цивили најмалку три години.

Вистина е. Ајде да видиме што ќе направат пратениците.

67 total views, no views today

ЗА ЧОВЕЧЕТО КОЕ СЕДИ ВО ПРЕМИЕРСКИОТ КАБИНЕТ

Што дознавме од говорот на Груевски?

images1. Дека своите информации Груевски ги добива од рекла-казала, оговарање и кафеански муабети, наместо од службите кои се задолжени за тоа да го информираат како премиер.

Така, во период од неколку недели голем број луѓе нашироко прераскажуваа што се планира, па таквите информации допреа и до мене од поголем број страни, главно мои познаници, пријатели, сопартијци, подржувачи и слично.

 2. Груевски се јавил до јавниот обвинител дека се слушаат оговарања и овој веднаш издал наредба за спроведување посебни истражни мерки. Изгледа вообичаено е јавниот обвинител штом ќе му се јави Груевски дека слушнал некое оговарање од своите другарчиња и пријатели да спроведе вакви мерки во однос на тој што го оговара.

Јас постапив на начин што случајот уредно го пријавив во надлежните институции, по што обвинителството издаде наредба за т.н. ПИМ мерки, во кои влегуваше снимање на разговорот, а потоа и останатите разговори на средбите со ЗЗ.

3. Пратениците се плашат од министрите и Груевски е тука да ги заштити.

На пример, ми прераскажа еден разговор во кој мене ми се јави еден конкретен пратеник кој се пожали од односот на еден министер, по што јас телефонски контактирав со министерот прашувајки го зошто го навредил пратеникот, на што министерот негираше дека нивната дискусија била онаква како што мене ми ја престави пратеникот, за што посочи и сведоци од присутните на нивната дискусија именувајки ги сведоците присутни по име.

 4. МВР имала информации за работа на странска служба, меѓутоа не му кажувала се до сега на Груевски (кој морал се да дознае од другарчиња). Меѓутоа сега се му кажале.

Според досегашните сознанија кои ги добив од МВР зад снимањето стои странска разузнавачка служба чии главен соработник во РМ е лицето З.В. кој развил своја агентурна мрежа во МК.

 5. Груевски е во директна врска со јавниот обвинител и со судиите кои му поднесуваат редовни извештаи. Како поинаку би знале дека материјалот добиен од компјутерите на еден од обвинетите е дешифриран и подготвен за доказната постапка во суд?

За среќа се ова е дешифрирано и обезбедено како доказ за на суд.

Информиран сум од МВР дека од нивната комуникација со обвинителството се цени дека за сето ова постојат цврсти докази, како матерјални, така и сведочења, а за дел од нив ќе говорам и подоцна.  Значи цврсти и непобитни докази.

6. Груевски е директно инволвиран и редовно известуван за секој податок добиен во текот на постапката. Која е таа независна истрага и кое е тоа независно судство кога премиерот се известува на дневна основа за сите докази, сведочења и признанија?

Според сведочењето и признанието пред истражните органи во правосудната постапка на двајца од притворените, лицето ЗВ врбувал две лица кои му помогнале во снимање на матерјалите за што добиле парична надомест.

И двајцата пред истражните органи изјавиле дека биле убедени дека тој материјал ќе заврши само кај странска разузнавачка служба, и дека никогаш нема да биде објавен јавно, што им влевало надеж дека никогаш нема да бидат разоткриени. Кај двете лица во извршениот претрес и проверки најдени се материјални докази за истотото и поголеми количини на пари и акции. Меѓу другото во претресот на лицето З.К. пронајдени се и ЦДа со снимени телефонски разговори  и тоа е пронајдено токму во неговата канцеларија.

7. Токму ваквата итно спроведена истрага во која активно учествува Груевски и која завршува со итно донесена пресуда (врз основа на признание) е најголем доказ дека во прислушувањата е вмешано Министерството за внатрешни работи и тоа со знаење на Груевски.

Со ова паднаа во вода и сите обвинувања на опозицијата дека ние стоиме зад прислушувањето за што всушност тие немаат ниту еден доказ.

 8. Груевски ни соопшти дека изнесените материјали за прислушуваните разговори се потполно валидни бидејки

… нивната анализа укажува дека оние кои го обавуваат снимањето со мобилната тактичка опрема се професионалци од висок калибар, високо обучени за такви дејствија.

 9. Груевски ни соопшти дека МВР не успеала да ги лоцира сторителите, меѓутоа тие се уапсени.

Да сумирам дека, во изминатиот период Македонија била таргет на снимање на телефонски разговори на странска разузнавачка служба, потпомогната од нивни соработници од РМ.

МВР за ова има и писмен извештај за наодите кои произлегоа од нивната работа, но досега неуспеа да ги лоцира сторителите, заради што, истрагата за ова сеуште е незавршена.

Директните извршители се уапсени.

Ние реагиравме соодветно и лицата кои го направија ова се фатени. Тоа е многу важно.

10. Груевски ни соопшти дека треба да бидеме благодарни што решил дел од своето богатство да го потроши на граѓаните. Според говорот на Груевски, не се градат болници, не се отвораат училишта, не се градат патишта од парите на граѓаните, туку ТИЕ (најверојатно мисли на ВМРО-ДПМНЕ) ни даваат (двојат од својата уста, вадат од сопствениот имот) само да бидеме среќни.

Ние сме истите тие кои ги зголемуваа платите и пензиите и социјалната помош, истите кои трчаат по светот по инвеститори и придонесуваат за отворање на нови работни места, кои прават програми за самовработување, кои градат патишта, болници, инвестираат во здравството, им помагаат на земјоделците, сакаат да поправат нешто во образованието, истите кои даваат бесплатни учебници, компјутери за секое дете, нови автобуси, булевари, водоводни и канализациони мрежи.

 11. Груевски ни соопшти дека барем во едно сигурно се точни прикажаните снимки – во простотијата и примитивноста и дека примитивизмот е карактеристика на високите функционери во власта и доказ дека се обични луѓе .

Нервоза, пцовки, гнев, лични негативни чувства, презир кон некого, вербални реакции од кои подоцна сме се срамеле или за кои сме се покајале сите ние сме искажале на различен начин, но важно е тие да не се суштината на нашето однесување.

12. Груевски ни соопшти дека слободата на мислење и изразување и заштитата на приватноста и независноста на судството и некорумпираноста на власта не се дел од реалниот живот, не се наши реални потреби и интереси.

Мојата порака до работниците, земјоделците, пензионерите, студентите, бизнисмените, професорите, лекарите, до оние кои се невработени, до оние кои ги тиштат истите секојдневни проблеми и кои бараат решенија на тие проблеми, мојата порака до сите граѓани е, важен е реалниот живот, реалните проекти, реалните потреби на сите вас …

 

Што ни покажува овој говор?

Дека за бадијала се пенавиме и се обидуваме да објасниме во што е проблемот.

Ова кутро човече нема појма што е право, што е судство, што е Парламент, што е извршна власт.

Нема појма за што служат институциите, што е тоа демократско валдеење.

Ова кутро човече нема појма што е држава.

39 total views, no views today

ШТО СЕ ПРАВИ КОГА РАКОВОДЕН КАДАР НА ПАРТИЈАТА КОЈА ПОБЕДИЛА НА ИЗБОРИ Е ОСОМНИЧЕН ЗА КОРУПЦИЈА?

За секоја партија во светот огромно бреме претставува искажан сомнеж дека некој од раководството, или дури и самиот претседател на партијата, е вмешан во корупција. За партија која победила на избори и која треба да формира Влада ова претставува уште поголем проблем.

Единствен начин да се ослободи од ова бреме е расчистување на случајот.

Тоа значи дека, во моментот кога Никола Груевски беше осомничен за прекршување на законот, тој мораше во истиот момент да се повлече од раководната улога и да побара спроведување на судска постапка во која ќе треба да бидат докажани овие сомненија. Не постапка за клевета, туку постапка во однос на основното обвинување за корупција. Тоа значи контрадикторна постапка во која ќе бидат изведени и соодветно испитани сите наводи на оние кои обвинуваат и во која ќе биде или докажана вина или пак ќе биде ослободен од натамошно сомнение.

Доколку Никола Груевски нема сили за такво нешто, тоа требаше да го направи партијата на која и припаѓа.

Посебно загрижува дека ниту Никола Груевски ниту ВМРО-ДПМНЕ не сакаат да се изведе ваква постапка дури ни во ситуација кога целокупниот правосуден систем е партизиран и составен од луѓе кои нема така лесно да се спротистават на владеачката структура. Со други зборови, се зголемува сомнението дека постојат таков вид докази кои нема да може да бидат пренебрегнати дури и од страна на партиски обоен суд.

Во отсуство на ваква постапка останува сомнението.

А вакво сомнение во однос на човек кој ќе стане премиер на државата, претставува тешко бреме за самата држава. Имено, кредибилитетот на државата е доведен во прашање. Доколку другите држави ја перцепираат Македонија како држава во која за премиер е поставен човек осомничен за голем коруптивен скандал, тие целата држава ќе ја перцепираат како корумпирана, несигурна и непожелна. Со тоа се намалува рејтингот на државата и таа стапува во било кој преговарачки процес во подредена улога.

На држава со така низок рејтинг и со багаж на корумпираност лесно можат да и се наметнат неповолни решенија во било кои преговори и договори.

53 total views, no views today