МИРНИТЕ ПРОТЕСТИ СЕ СУШТИНСКИ ЕЛЕМЕНТ НА ДЕМОКРАТИЈАТА

Приведени четворица припадници на Левица поради протест
  1. Никако не смее да биде ограничено правото на протест.
  2. Приведувањето во полициска станица заради легитимирање е само лош изговор за отстранување на протестантите.
  3. И јас сум многу против прикажување на оружје на плоштадите низ земјата и промоција на воена моќ па уште на странска држава. На што личи ова? Војници во полна воена опрема и тенкови под полно вооружување? Срамно и јадно. Тој што го дозволил малку да се чукне со прст по глава. Сте виделе вакво нешто во некоја друга држава? А да донесевте и деца од градинките и основните училишта малку да се промешаат меѓу оружјето?

МОЈОТ КУТАР УПЛАШЕН НАРОД

Во наградениот портал за најдобро пренесување на пораките на Груевски, пардон, за најдобро информирање оваа година, “Курир“, прочитав: “Пред новогодишните и божиќните празници, граѓаните сакаат мир, спокој и среќа, а не мала група протестанти кои не знаат за што протестираат“.

И знаете што е најстрашното, има право.

Граѓаните на Македонија ќе собираат отпадоци од кантите за ѓубре и ќе си бидат среќни и во празнично расположение. Ќе трпат се додека не паднат на земја и не почнат да ги газат, па и тогаш ќе причекаат малку да видат дали тој што ги гази нема да престане (од досада на пример или да не си ги извалка чевлите).

Меѓу луѓето кои протестираат нема гладни, ниту на прагот на егзистенцијата, ниту фрлени на улица без ништо и никого. Тие баш можат да си одат да си купуваат подароци и да си накитат елки и да си слават Нова година покрај богати трпези. А тие, будали, излегле на улица, мрзнат, викаат и се обидуваат да допрат до заспаната свест на македонското човече.

Сега е време да им се придружат стечајците и железничарите и охисовците и лекарите и сета згазена администрација и сето понижено образование и оние 600000 кои живеат под прагот на сиромаштијата и луѓето со нехетеросексуална ориентација и Ромите и Плоштад Слобода и Аман и сите невладини организации за заштита на човековите права и се разбира студентите.

Парламентот е укинат. Уставниот суд одамна не живее во Македонија. Судовите се шутнати, а полицијата претворена во банда. Народниот правобранител е награден за послушноста, антикорупциската е потполно слепа, а Комисијата за заштита од дискриминација се скри во својот голубарник.

Сега е време да не има или потполно ќе не снема.

ПРОТЕСТИ И КОНТРАПРОТЕСТИ

Се намножија контрапротестите во Македонија. На секој протест по автоматизам веќе следи и контрапротест со објаснување дека и контрапротестот е облик на искажување на мислењето и контрапротестантите имаат еднакви права како и протестантите.

Што е погрешно тука?

1. Правото на протест е облик на демократска контрола над власта и затоа и е уставно загарантирано (со цел власта да не ја попречи оваа и ваква контрола). Контрапротестите всушност не се вистински протести туку претставуваат поддршка на власта (некоја нејзина политика, став, тврдење, активност). Со употребата на називот протест се извртува вистинското значење на овој вид на искажување на мислењето, а тоа не е контрола на власта од страна на граѓаните, туку поддршка на власта од страна на граѓаните. Скраја од паметот е дека контрапротестите, односно, поддршката на власта, не се ниту опасни за граѓаните, ниту ги загрозуваат ниту пак бараат заштита на граѓаните од власта (која всушност ги милува во огромне размери).

2. Со организирањето на контрапротести (поддршка на власта) по автоматизам всушност се загушува правото на протест на граѓаните. Имено, наместо граѓаните да имаат можност да го искажат своето несогласување со одредена политика на власта, да бидат слушнати од власта и да им се создадат услови да понудат алтернативни решенија, тие се ставаат во ситуација да се бранат од поддржувачите на власта, се да се претвори во огромен хаос во кој не се знае кој што бара и да се изгуби смислата на организираниот протест.

3. Бидејки протестите се закаќуваат однапред тие мора да подлежат на законските процедури на закажување, известување и процедурите поврзани со одржување на редот. Контрапротестите (поддршаката на власта) вообичаено се подведува под спонтано собирање на граѓаните и всушност оние кои ја поддржуваат власта добиваат привилегирана положба во однос на оние кои ја критикуваат.

Со ваквиот начин на постапување сигурно дека губат граѓаните кои само навидум го имаат правото на протест, меѓутоа губи и власта (и покрај тоа што оваа и ваква власт не е свесна за тоа). Имено, секоја мудра власт сака да слушне што е тоа што и го забележуваат граѓаните, да проба да ги идентификува своите пропусти и врз основа на ваквите сознанија да изгради стратегија за промени кои ќе ја промовираат како добра власт.

Некои луѓе би рекле дека властодршците на овој начин го потврдуваат ставот дека се глупи кецароши кои немаат појма од владеење и управување и кои ја водат државата во пропаст. Јас не го велам тоа. Јас мислам дека дефинитивно треба да им дадеме уште една шанса во нов мандат да го утврдат материјалот. Жртвите не се важни кога станува збор за образование. Ако треба ќе испоцркаме, ама членовите на ВМРО-ДПМНЕ ќе поминат во следното одделение.

НАРОД ЗА ЖАЛЕЊЕ

Во Шпанија не стивнуваат демонстрациите.

Во Грција летаат молотови коктели.

Кај нас партиите се измотаваат со граѓаните.

Треба да си навистина многу за гревота народ наместо да побараш одговорност затоа што некој ти ги потрошил парите на глупости и да го искажеш сопствениот револт ако треба и на многу драстичен начин, ти да го штитиш манипулаторот и неговото (не) дело.

Треба да си навистина поданички народ наместо да побараш одговорност за недомаќинското работење на власта која и става економска ортома околу вратот на оваа и на наредните седум генерации, ти да се радуваш на трошките кои ти ги фрлаат.

Можеби е дојдено време на граѓаните на Република Македонија  да им се одземе деловната способност заради тоа што не се во состојба да ги сфатат значењето и правните последици на дејствијата кои ги прави власта, не се во состојба да се грижат за себеси и за заштита на своите права и интереси,  не знаат да управуваат со сопствениот имот и ја загрозуваат сопствената и егзистенцијата на своите деца.

Во спротивно може да дојдеме до ситуација сите  сами да се одвеземе на колење (во сабота со бесплатни карти дадени од власта).

 

 

Протестот е демократско право и начин на изразување на мислењето на граѓаните

Јас ги поддржувам протестите против поскапувањето на струјата, водата, парното, бензините и се останато и против решенијата на Регулаторната комисија со кои власта ги поддржува и овозможува овие поскапувања.

Наспроти обидите на власта да го дезавуираат значењето на протестите и да ја префрлат вината врз приватниот сектор јас мислам дека протестите се неопходни, корисни и можат да дадат позитивни (за граѓаните) резултати.

1. Луѓето со векови се бореле за слободата на изразување на мислењето, слободата на собирање и слободата на протестирање. Тоа се едни од највисоките дострели на современата демократија. Само многу глупи луѓе чии мозоци ги измила фашизоидната власт кој во моментов ја имаме во Република Македонија, не го разбираат тоа. Протестот е начин на кој граѓаните најасно кажуваат кога нешто не им се допаѓа, кога нешто треба да се промени и кога имаат очекување од власта тоа да го направи доколку и понатаму важи одредбата дека суверенитетот во Република Македонија им припаѓа на граѓаните. Што поголем број толку е посилен гласот, толку е помоќна пораката и толку пострашни треба да бидат за власта доколку не сака да ги слушне. Протестите сигурно имаат лимитирани ефекти, меѓутоа неискажувањето на мислењата значи молк кој може да биде пртолкуван како прифаќање. Од друга страна, само со искажување на мислењето може да започнеме да бараме нови и поинакви решенија по принципот повеќе глави подобро мислат.

2. Протестите треба да бидат против власта, а не против приватникот. Власта е таа која ги одредува правилата на игра, власта е таа која ги поставува границите и власта е таа која што се обврзала да ги штити правата и слободите на граѓаните. Не за бадијала постои Регулаторна комисија (како орган на власта, а не на приватните сопственици). Таа комисија треба да го заштити јавниот интерес наспроти несомнениот интерес на приватникот да зграпчи што е можно поглем профит. Таа комисија треба да постави брана на лакомоста на приватникот и да најде баланс меѓу приватниот и општествениот интерес. Таа комисија  треба да им одговори на граѓаните зошто е создадена ситуација во која го штити приватникот за сметка на општетсвениот интерес.

3. Многу глупо и примитивно е објаснувањето на власта дека секаде во светот се поскапува струјата, и парното и водата. И безобразно. И само маломен неедуциран народ може да го прифати ова како валидно објаснување. Зошто? Затоа што:

  • Постојат начини на кои може власта да интервенира во цените на овие услуги (пред се со намалување на своите зафаќања, со прогресивно оданочување или со различно оданочување на различни количини од потрошеното).
  • Постојат енергетски проекции кои треба да го предвидат овој тренд и со кои власта треба да најде најсоодветен начин за заштита на граѓаните (поддршка на алтернативни извори на енергија, искористување на сончевата и термална енергија, субвенционирање/вистинско не оние шарени лажки кои во моментов ни ги продава власта/ на термоизолацијата на куќите, откуп на електрична енергија која би ја произведувале граѓаните со сончеви колектори).
  • не може да се изедначи цената на чинење на овие услуги со цената во земји каде што платите на луѓето се 10-20 пати поголеми од оние на граѓаните во Македонија.

ЗАРАДИ ОВА СМЕТАМ ДЕКА ТРЕБА ДА СЕ ИЗЛЕЗЕ НА ПРОТЕСТИ И ВПРОЧЕМ МИСЛАМ ДЕКА ОВАА ВЛАСТ ТРЕБА ДА БИДЕ СРУШЕНА.