ЗА БУЏЕТИТЕ

Слушнав дека опозицијата не била конструктивна затоа што се спротиставувала на донесување на буџетот и поставила одредени барања за негова промена, а со тоа сакала да ја спречи реализацијата на програмата на владата.

Навистина одамна се откажав во обидите да разберам што се случува во главата на високите функционери од ВМРО-ДПМНЕ. Едноставно функционираме на толку различни нивоа што ми станува тешко дури и да се обидам да ја разберам нивната логика, а камоли да проникнам во следот на нивните мисли.

Меѓутоа, ова тврдење претставува школски пример на неразбирањето на основните механизми на демократијата и показател за мојот став дека во Македонија има само кулиси на демократија, зад кои се затскрива примитивна автократија облечена во руво на ретрокомунизам.

Зошто го мислам ова?

1. Основна задача на опозицијата е да ги контролира потезите на власта. Опозицијата по правило треба да поставува прашања, да оспорува решенија и да нуди алтернативи. Тоа значи дека опозицијата треба да го протресе од глава до пети секој дел секоја ставка од буџетот, да побара објаснување и доколку не е задоволна да интервенира. Сите оние зборувања за транспарентност, отчетност, партиципација, мора да бидат присутни токму во расправата за буџетот и да не им остават на граѓаните сомнеж дека некој си игра со нивните пари.

2. Буџетот не е своина на владеачката партија исто како што не се нејзина сопственост имотите и парите со кои располага само затоа што граѓаните и дале доверба тоа да го прави. Тоа значи дека во Собранието мора да има неверојатно исцрпна расправа (во одделни држави овие расправи траат со месеци) за секоја точка од буџетот и сите пратеници треба да бидат многу сигурни во она што го нуди Владата и никако не може да се очекува да го прифатат така како што е предложено. Процесот на усвојување на буџетот е процес на расчистување, прецизирање, договарање и кмпромиси. Се друго излегува надвор од праксата на демократијата.

3. Во моментот кога власта ќе објави дека нема намера да прифати ниту еден предлог на опозицијата и дека овие предлози ги разбира како уцена, во тој момент власта објавила дека нема намера да ги почитува правилата на демократијата и има намера да практикува автократија или диктатура.

4. Во моментот кога власта ќе одбие да започне разговор во врска со елементите за штедење предложени од страна на опозицијата, тоа претставува јасна порака дека таа власт ненаменски ги троши средствата од буџетот и не сака да се доведе до ситуација да одговара за недомаќинската работа.

Во интерес на граѓаните е да се растресе буџетот. Во интерес на граѓаните е да се прецизираат елементите на трошење. Во интерес на граѓаните е да се отфрлат ставките низ кои се одлеваат пари кои не се поврзани со задоволување на потребите и интересите на истите тие граѓани. Во интерес на граѓаните е власта да штеди на луксуз. Во интерес на граѓаните е власта да биде контролирана во трошењето на нивните сопствени пари.

Само во услови на постојано заглупување на граѓаните, отсуство на релевантни информации, манипулациии и полуманипулации со незнаењето, многу очекувано е луѓето да стекнат впечаток дека власта ги брани нивните интереси, а опозицијата ги загрозува.

МОЈ ПРЕДЛОГ ЗА ВОСПОСТАВУВАЊЕ НА ДЕМОКРАТИЈАТА ВО РЕПУБЛИКА МАКЕДОНИЈА

Основните недостатоци на структуирањето и практикувањето на власта во Република Македонија во актуелниот момент се:

1. Партиципација на граѓаните (учество во донесувањето на одлуки на локално и централно ниво). На пример: за урбанистички план, за трошење на средства, за промена на имиња на училишта, улици, плоштади, за промена на закони за работни односи, социјална заштита, здравствена заштита, …

2. Контрола над власта ( постоење на механизми и услови граѓаните да кажат кога нешто не им се допаѓа, тоа што ќе го кажат да биде земено предвид, да не трпат негативни последици заради искажаното мислење и искажаното мислење да има видливо влијание во менувањето на политиките, практиките и санкционирањето на прекршувањата на законите).

3. Заштитни механизми (независни судови кои нема да судат според слободното уверување најчесто партиски детерминирано, туку според законите, на еднаков начин за сите во сите услови; моќен јавен обвинител кој ќе го штити законот и правото, а не политичкиот естаблишмент; можен народен правобранител кој ќе биде страв и трепет за власта; моќна антикорупциска комисија која ќе биде ноќна мора за секој политичар; компетентна комисија за заштита од дискриминација која ќе може да информира, помага, разрешува и спречува случаи на дикриминација).

Бидејки ниту еден од овие столбови на демократијата не постои во Република Македонија на граѓаните им остануваат неколку правци на делување:

1. Да молчат и да се надеваат дека ќе куртулат од самоволието на владеачката структура.

2. Да гласаат од време на време и да ги менуваат оние кои ги јаваат, дерат, толчат, мрцварат и газат.

3. Од време на време да се возбудуваат и да излегуваат на улица во поголем или помал (но никогаш и доволен) број и да придонесуваат за ширење на приказната за карванот кој минува и кучињата кои лаат.

4. Да пробаат да ги искористат правните механизми кои им ги нуди демократската држава.

Јас лично би ги повикала граѓаните да пробаат со четвртиот метод.

1. Зошто: на тој начин не се руши туку се гради правниот поредок на државата, се зголемува одговорноста на индивидуите, се спречуваат (намалуваат) идни прекршувања на законите, се испраќа порака не само на актуелната туку и на сите идни власти.

2. Како: со поднесување на индивидуални тужби против секој кој го прекршува законот. Кога велам секој, мислам СЕКОЈ. На секој документ со кој од граѓаните нешто се бара, се нуди, се прашува, се промовира и зад секоја одлука стои некој со име и презиме. Тој некој со име и презиме треба да се тужи. Градоначалник, Претседател на држава, министер, претседател на месна заедница, референт, началник, раководител на сектор, извршител, судија, јавен обвинител, Народен правобранител, претседател на Комисија за заштита од дискриминација или корупција, … Конкретен човек кој е потпишан на одлуката, решението, …

3. Што се постигнува на овој начин: не се подлегнува толку лесно на притисоците од надвор и од внатре, се размислува пред да се потпише, се бараат соодветни решенија, на цена доаѓаат  знаењето и чесноста и некорумпираноста, нема затскривање зад барањата на надредените или зад незнаењето и апатичноста на корисниците на услуги, државните службеници (вклучително и Претседателот, Премиерот, министрите и сите останати раководни службеници) ја добиваат улогата која што треба да ја имаат во едно демократско општетсво – платени извршители кои работат за граѓаните.

4. Како да се направи тоа:

а) граѓански тужби и тужби за оштета (подразбираат трошоци и можат да ги поднесат само луже кои имаат средства или пак оние кои можат да добијат соодветна поддршка од невладините организации за конкретни случаи кои може да се искористат како системски)

б) кривични пријави до јавниот обвинител (многу мал трошок)

в) приватни кривични тужби за помал број кривични дела

г) тужби до Управниот суд за кои се плаќа многу мала такса.

Ова е начин на кој може да се измери граѓанското незадоволство, може да стане статистички значајно и да биде искористено и пошироко во борбата со одредена владеачка структура но и со поединци кои ја узурпираат власта.

Гласноста во и при поднесувањето на тужбите е многу важна. Мора да се најде заеднички јазик со медиумите.

Во наредниот период на мојот блог ќе ставам урнеци за граѓански тужби, пријави до ЈО, приватни кривични тужби и тужби пред Управниот суд.

Јас моето го направив, сега редот е на вас.

ВМРО-ДПМНЕ СЕ ПРОГЛАСИ ЗА НЕКОМПЕТЕНТНО ДА ЈА РАКОВОДИ ДРЖАВАТА

Во врска со оставката на државната  пописна комисија и прекинувањето на пописот на населението 2011 година, на официјалната страна на ВМРО-ДПМНЕ се појави изјава со која се утврдува дека партијата нема друг начин да ги разреши прекршувањата на законот во текот на пописот освен да го поддржи неговото прекинување.

Прво, ваква изјава е соодветна за опозициона партија која повикува на почитување на законите затоа што е надвор од позицијата на власт, а не за партија која ја има апсолутната власт во свои раце и целокупниот механизам за заштита и санкционирање за прекршување на законите.

Второ, доколку владеачката партија не е способна самата да спроведе одредена активност согласно законите и да го казни евентуалното прекршување тогаш како може да очекуваат граѓаните да бидат заштитени од било каков вид на незаконски дејствија од страна на физички и правни лица.

Трето, потрошени се огромни средства кои се платени од даночните обврзници и никој нема намера да превземе одговорност ниту за тоа ниту за неуспешниот попис.

Четврто, ВМРО-ДПМНЕ се обидува вината за сопствената неспособност да владее повторно да ја префрли врз СДСМ, како политичка партија која веќе 6 години не е накормилото на власта.

Петто, со овој вид на реакција, ВМРО-ДПМНЕ јавно изјавува дека не е способна како партија да ја води државата и не е во состојба да ги применува законите на територијата на државата.

Со други зборови, во моментов во државата има безвластие а ние сме го обрале бостанот.

ТОЈ ШТО ГО КРШИ ЗАКОНОТ КОГА ГО БИРААТ СИГУРНО ЌЕ ГО КРШИ 100 ПАТИ ПОВЕЌЕ ОТКАКО ЌЕ ГО ИЗБЕРАТ

Во Изборниот законик стои:

Член 74

Од денот на донесувањето на Одлуката за распишување на избори до завршување на изборот на претседател на Република Македонија, пратеници во Собранието на Република Македонија и изборот на Владата на Република Македонија согласно со резултатите од изборите, како и од денот на донесувањето на одлуката за распишување на избори па до завршувањето на изборите за избор на  градоначалник или членови на советот, односно до конституирањето на Советот на општините и Градот Скопје не може да се врши никаква вонредна исплата на плати, пензии, социјална помош или други исплати од буџетски средства или средства од јавни фондови.

ЗАПОЧНУВАЊЕ НА ИЗГРАДБА НА ПРИМЕР НА КАТНА ГАРАЖА Е СПРОТИВНО НА ОВОЈ ЗАКОН НЕЗАВИСНО ОД ТОА ДАЛИ СРЕДСТВАТА СЕ ДАВААТ ФОРМАЛНО ОД СРЕДСТВАТА НА ГРАДОТ (ПОСЕБНО КОГА НАПОСТАВУВАЊЕТО НА КАМЕН ТЕМЕЛНИК СЕ ПРИСУТНИ ВИСОКИ ФУНКЦИОНЕРИ ОД ВЛАСТА)

Според Член 75-а

(1) За време на изборната кампања, радиодифузерите кои ги покриваат изборите можат да емитуваат 15 минути дополнително време за рекламирање на реален час емитувана програма, исклучиво наменети за платено политичко рекламирање, од кои за еден учесник во изборната кампања можат да одвојат најмногу 10 минути.

НАСТАПИТЕ НА ВИСОКИ ФУНКЦИОНЕРИ ОД ВЛАСТА КОИ СЕ ИСТОВРЕМЕНО И КАНДИДАТИ НА ЛИСТИ ЗА ПРАТЕНИЦИ МОРА ДА СЕ ЗАСМЕТААТ ВО ОВАА МИНУТАЖА. СЕ ДРУГО Е ЗЛОУПОТРЕБА НА ПОЛОЖБАТА И ПОВЛЕКУВА И КРИВИЧНА ОДГОВОРНОСТ. Кон ова мора да се приклучат и членот 76 и членот 84-а.

За останатите случаи на злоупотреба на должноста и кривичната одговорност во наредните написи.

ЗА ГРУЕВСКИ, ГОРДАНА ЈАНКУЛОВСКА, МАНЕВСКИ И ОСТАТОКОТ ОД ОРГАНИЗАЦИЈАТА СОСТАВЕНА ОД НАЈМАЛКУ ТРИ ЛИЦА ЗДРУЖЕНИ ЗА ВРШЕЊЕ НА ОДРЕДЕН ВИД ДЕЛА

Мојата држава е место каде што владее насилството, каде што незнаењето е предуслов за успешност и каде што криминалците немаат потреба да се кријат и да ги прикриваат трагите на сопствените криминални дејствија, туку, едноставно ги озаконуваат.

Во мојата држава е применета неверојатно успешна криминална формула:

Носителите на власта ги прекршуваат законите и не одговараат за тоа
Граѓаните стануваат дел од различните шеми на прекршување на законот
Законите стануваат параван на самовластието
Беззаконието води кон конфликти
Конфликтите раѓаат насилство
Насилството носи на власт насилници
Циклусот е затворен.

Се прашував, зошто граѓаните не се бунат против овој вид на власт. Ме измачуваше пасивноста дури и во ситуации кога недвосмислено се засегнати нивните сопствени интереси и кога најнепосредно ги трпат последиците на неограничената политичка моќ. Објаснувањето го барав во стравот, непознавањето на правото и на механизмите на заштита, во необразованоста, зависноста, реликтите на претходниот систем. Многу грешев.

Всушност објаснувањето е многу едноставно. Создаден е систем во кој луѓето се сведени на нивната елементарна егзистенција. Во услови на секојдневна борба за базично преживување секој ја искористува можноста за прекршување на законот. Ситно, безначајно. Пола метар зафатен од тротоарот, неплатена струја за два месеци, изорана меѓа на комшијата, дивоградба, забушен данок од 2000 денари, измолена петка за заблуденото дете, сината казна за пребрзо возење, … Вла

ста не реагира, не казнува, не се спротиставува. “Добра“ е кон малиот човек. Нуди легализација на дивоградбите, простување на долговите, намалување на даноците, кинење на казните. И, мрежата е сплетена. Секој го варди својот дел од неправото, секој се плаши дека ќе го изгуби она малку што го грабнал или дека ќе биде казнет за направеното.

А пајакот е тука да го исшмука пленот.

Резултатот е неминове. Секој е забиен во својот агол, ‘ржи и ја брани коска та за глодање дофрлена од насилниците. И на власта и е навистина лесно. Важно е секој да има по една коска за глодање и таа е мирна.

А мојата држава станува ѓубриште на кое се шетаат бесни кучиња.